Showing posts with label Hagonoy. Show all posts
Showing posts with label Hagonoy. Show all posts

Sunday, March 9, 2014

Epekto ng operasyon ng fishpen sa pangisdaan





HAGONOY, Bulacan—Maramot na dagat.

Ito ang minsa’y nasambit ni Kagawad Alfredo Lunes ng Barangay Pugad sa bayang ito kaugnay ng pagbaba ng dami ng nahuhuling isda sa baybayin ng Manila Bay ng mga maliliit na mangingisda.

Ang pahayag na ito ay nasabit ni Lunes tatlong taon na ang nakakaraan, at muli pang kinumpirma ng iba pang mangingisda sa nasabing barangay noong 2012.

Nitong nakaraang Biyernes, Pebrero 28 ay muling inulit ng mga mangingisda at opisyal sa bayang ito ang patuloy na pagbaba ng dami ng isdang nahuhuli sa karagatan.

Ang tinutukoy nilang sanhi ngayon ay ang operasyon ng mga fishpen sa baybayin ng mga Barangay ng Pugad, San Roque at San Pascual.

Ang mga naturang fishpen ay dating mga palaisdaan na ang nagsisilbing pamigil sa tubig at isdang laman ay ang pilapil na yari sa lupa.

Ngunit dahil sa pagkaubos ng mga tanim na bakawang nagsisilbing panangga sa mga alon, ay nadurog at tuluyang nawasak ang mga pilapil ng may 800 ektrayang palaisdaan sa baybayin.

Hindi tumigil ang operasyonng mga nasabing palaisdaan dahil ito ay binakuran ng matataas na lambat, kaya’t sa halip na tawagin itong palaisdaan at tinatawag na ngayong fishpen o kulungan ng isda.

Ayon kay Konsehal Elmer Santos, ang operasyon ng mga fishpen ay nakakasira sa kalidad ng tubig sa baybayinng bayang ito.

Ito ay dahil sa ang mga fishpen ay nagsasagawa ng intensive fish farming gamit ang mga aqua feeds.

“Madalang na ngayon ang talaba, tahong, pati alimasag saka mga biya,” sabi ni Santos.


Maging ang iba pang lamang dagat tulad ng hipon at maliiit na isda ay apektado.

Dahil dito, halos walang kinikita ang mga maliliit na mangingisdang namamanti, umuumang ng baklad at bukatot.

“Parang nalalason ng tubig ang mga semilya ng isda at iba pang lamang dagat,”sabi naman ni Louie Libao, ang fishery officer ng bayang ito.

Binigyang diin pa niya na dahil sa pagkasira ng mga pilapil ng palaisdaan, maging ang daloy ng agos sailog ay apektado.

Bilang isang dating konsehal ng bayan na nagtaposng kursong Fisheries, sinabi ni Libao na hindi lamang mga operator ng fishpen ang gumagamit ng aqua feeds, kungdi maging ang namamahala sa malalaking palaisdaan o bigtime fishpond operators sa bayang ito.

Subalit bibigyang diin niya na dahil sa ang tubig sa fishpen ay labas pasok lamang, ang katas ng mga aqua feeds ay natatangay na rin agos.

Ayon kay Libao, ang katas ng aqua feeds sa mga palaisdaang buo ang pilapil ay medyo humuhupa pa ang epekto dahil matagal ito bago patapunin sa ilog.

Bukod dito, ang mga palaisdaan ay napapatuyuan pa ng tubig na naibibilad sa araw ang lupa,samangtaolang ang fishpen ay hindi.

Ipinaliwanag pa niya na ang mga banlik o burak samga fishpen ay kinakayod ng mga operator gamit ang lambat na may pinong butas.

Ito ay upang matanggalang banlik ng nadurog na aqua feeds at mga dumi ng isda na naiwan sa fishpen.

Ngunit ang mga burak na ito ay sa dagat din lamang itinatapon kaya’t ito ay nakakapekto pa rin sa mga semilya ng isda.

Dahil dito, ipinayo niya ang pagbuo ng isang ordinansa na magtatakda ng regulasyon  sa operasyon ng mga fishpen.

Para naman kay Santos, sinabi niya na nagbubuo na ang Sangguniang Bayan ng Hagonoy ng isang katulad na ordinansa.

Bilang patunay, nagsagawa na sila ng water sampling at ito ay kasalukuyang nilang ipinasusuri sa laboratoryo ng Department of Science and Technology (DOST).

“Hinihintay na lamang naming yung resulta ng lab test ng DOST dahil isa iyon sa magsisilbing batayan namin,” ani Santos.

Iginiit pa niya na patuloy ang pakikipag-ugnayan ni Mayor Raulito Manlapaz sa operator ng fishpen sa bayang ito.

Si Manlapaz at ang pamilya ng kanyang maybahay ay nabibilang sa mga malalaking namamalaisdaan sa bayang ito.

Ayon kay Santos tutol si Manlapaz sa operasyon ng fishpen dahil sa epekto nito sa pangisdaan.

Ngunit ang iginigiit ng mga operator ng fishpen ay hindi nila kayang pigilan ang pagkasira ng mga pilapil ng kanilang palaisdaang binubuwisan.

Nagpahayag din ang mga operator ng fishpen na nakahanda silang tumigil sa operasyon kung ang mga pilapil ng palaisdaan sa baybayin ng bayang ito ay maipakukumpuni ng pamahalaang lokal.  (Dino Balabo)

Saturday, February 1, 2014

Produksyon ng isda sa Bulacan apektado ng malamig na panahon





HAGONOY, Bulacan—Libo-libong binhi ng tilapia at iba pang isda ang nangamatay sa lalawigan ng Bulacan dahil sa malamig na panahon.

Sa mga lalawigan ng Aurora at Nueva Ecija ay apektado din ang pangisdaan at mga pananim sa bukirin.

Bukod dito, bumaba rin ang produksyon ng isda dahil halos hindi makapamalakaya ang mga mangigisda sa Manila Bay.

Maging mga namamalaisdaan sa bayang ito ay namumuroblema dahil ilan sa kanila ay nalusawan na ng alagang isda at sugpo.


Ang kalagayang ito ay isinisisi sa malamig na panahon hatid ng hanging amihan na nagmumula sa hilagang silangan ng Luzon.

Ayon kay Felix Tirado, tagapamahala ng Bureau of Fisheries and Aquatic Resources (BFAR) Technology Outreach Station for Brackishwater sa bayang ito, maging ang kanilang binhi at mga saline tilapia breeders ay naapaketuhan na ng pagbaba ng temperatura hatid ng malamig na panahon.

Batay sa tala ng BFAR, umabot sa mahigit 30,000 binhi ng saline tilapia ang namatay noong nakaraang linggo, bukod pa sa 47 breeder o inahin.

Ang nasabing bilang ay halos 10 porsyento ng kabubuong 3-Milyong produksyong binhi ng saline tilapia sa nasabing BFAR hatchery sa buong taon.

Ang saline tilapia ay ang uri ng tilapia na inaalagaan at pinalalaki sa tubig alat o malapit sa mga karagatan.

Ang mga binhing produksyon sa hatchery ng BFAR sa bayang ito ay ipinamamahagi ng libre ng tanggapan sa mga magsasaka at namamalaisdaan sa buong Gitnang Luzon.

Ayon kay Tirado, ang paglamig ng panahon ay nakakapekto sa kanilang mga alagang isda.

Ito ay dahil sa humihina ang pagkain ng mga isda kapag malamig ang panahon, at dahil dito, humihina rin ang katawan kung kaya hindi makatagal sa lamig ng ng panahon at namamatay.

Bukod dito, ang lamig ng panahon ay nakakadagdag samga stress na nararanasan ng mga isda, kabilang na ang malalaki nilang tilapia breeders.

Ayon pa kay Tirado,ang paglamig ng panahon ay nakakabawas din sa dissolved oxygen sa tubig.


Ipinaliwanag pa niya na ang mga oras sa pagitan ng alas-12ng gabi at alas-6 ng umaga ang may pinakamababang dissolved oxygen sa tubig.

Ito ay dahil sa kawalan ng sikat ng araw at liwanag na naghahatid ng photosyntheis sa tubig at lumilikha ng dissolved oxygen.

Kaugnay nito, ipinabatid din ni Tirado na sa nagdaang dalawang linggo ay ilang namamalaisdaan sa bayang ito ang nag-ulat na nalusawan sila ng alagang  sugpo.

Ito ay dahil na rin sa paglamig ng panahon.

Ayon kay Tirado, kapag maliliit pa ang alagang sugpo, malaki ang posibilidad na maapektuhan ang mga ito ng pagbabago sa temperatura ng panahon.

Kaugnay nito, ilang mangingisda sa bayang ito ang nagsabing, bumaba ang produksyon ng isda mula sa unang linggo ng Enero.

Ito ay dahil sa halos walang mahuli sanhi ng malamig na panahon, bukod pa sa iniinda ng mga mangingisda anglamig ng panahon sa karagatan kung gabi at madaling araw.

Samantala, iniulat ng pahayagang Punto Central Luzon noong Enero 30  na nakakapagpabagal sa paglaki ng pananim na gulay at ibaang halaman ang pagbaba nbg temperatura.

Ang kalagayang ito napansin ng mga magsasaka sa Lungsod ng Munoz sa lalawigan ng Nueva Ecija.

Sa lalawigan ng Aurora, iniulat  din ng Punto Central Luzon na nagsimula na ring tumaas ang presyo ng mga isda dahil sa mababang produksyon sanhi ng malamig na temperatura na sinisisi rin sa pagkamatay ng apat na matatandang lalaki. (Dino Balabo)